Kiuniq uvunga Ilinniarnikkut Maligaqmi Ihivriuqnirmi kingulliqpaaq unniutjuti

Tuhaqtitauhainnaqtukhaq

Kiuniq uvunga Ilinniarnikkut Maligaqmi Ihivriuqnirmi kingulliqpaaq unniutjuti

IQALUIT, Nunavut (Nuvaipa 16, 2015) – Uqauhinun Kamisina kiuyuq uumunga kingulliqpaamun unniutjutaanun uvani Aallangayuni Katimayiinni Ihivriuqhiyukhat Ilinniarnikkut Maligaqmik iliyauhimayuq katimatjutikhamun Nuvaipa 5mi, 2015 uvani Nunavut maligaliuqviani. Pitquitjutimini tunihimayamini katimayiralaanguinnaqtunun Uqauhinun Kamisina angiqhimayuq Ilinniarnikkut Maligaq tunihiyukhaq tamainni turaanganirmik tautukhimanikkulluunniit uqautimik (makpiraaq 9). Ihariagininganilu atauhiuyumik titirauhimik Inuktut (makpiraaq 10). Kingulliqpaakkut, Uqauhinun Kamisina angiqhimayut taimaatut “…nutarannuani iliharniit anginiqaqtuq iliharnikkut nakuuyumik inirutikhani” (makpiraaq 12).

“Kihimi, kingulliqpaaq unniutjuti kinguvaqtutut ittuq hapumminikkut annaumanahuarnikkut Inuktut taimaatut Nunavut havakpiarutigivaktaa piliurnikkut. Uqautiqaqtuq unniutjutimi ihumaalungnaqtunik”, uqaqtuq Uqauhinun Kamisina Sandra Inutiq. Katimayiralaanguinnaqtun uqariiyaqhimayut piyumaniq hapkunaniittuq “hakugiktuni iliharnikkut tunngavikhani” uvaniluunniit “ilaqaqtumik uqauhinik, pitquhinik ingilraangniutaniklu” (makpiraaq 9). “Ihumaginiq pitquitjutiqaqtuq piyumanirni ukunani uqauhikkut, pitquhikkut ingilraangniutanilu uvaniluunniit iliharnikkulluunniit aulahimatjutiqaqtuq kavamauliqinikkut ihumaginikkut Inuit pitquhiit uqauhiillu nakuulluangittut, pilimaittullu iliharutaulutik. Uqauhiit, pitquhiit iliharniillu tautungniqaqtukhaungittut atauttikkut kikliqaqtut” Inutiq uqaqtuq.

Taapkunuuna uqauhikkut maligani Nunavut piniarhimayuq aajikkiiqniqarnirnun tamainni ilitariyauhimayuni uqauhini. Inuit Uqauhinginnun Tammaqtailinirmut Maligaq uvanilu ilanginni pitjutainni Ilitariyauhimayunut Uqauhinut Maligaqmi ilitariyaa Inuit uqauhia ihariariqpiaqtuq qunmuktittiniami aajikkiikniqariangani aallanun ilitariyauhimayunun uqauhinun ukunani Qaplunaatun Uiuitunlu. Taimaatut taamna Ilinniarnikkut Maligaq piliuqtauhimangamat talvanilu, piniarhimatjutiat maligaqmi ukunanilu uqauhini maligani aajikkiikniqaqtut. “Naunaqtuq uvamnun hunamik tukihitjutiqaqtuq uumani uqautimi “aallanin-maliganin pitquitjutit ikayuqtakhaa Ilinniarnikkut Maligaq taamna”. Kihiani uqautiqaqqat una pilaaruti tahamaniittukhaungittuq. Piiyarniit pilaarutinik ihumaalungnaqtuq” Inutiq uqaqtuq.

Katimayiralaanguinnaqtun tukhiqhimayullu atauhiinnarmik qanuriliurutikhamik (makpiraaq 14) uqaqhuni ayurnaitqiyauniaqtuq tilinikkut ilinniarutikhanik. Naunaqtuq

kitumik uqauhimik tukhiqtauyuq atuqtauluni ilinniarutikhamik uvani atauhiinnarmi qanuriliurutikhami. Uvani Uqauhinun Kamisinaup titiraqhimayainni tunihimayainni uqaqhimayuq aallakkiit uqauhikkut piuyut nunallaani ihumagiyauyukhat. Hapummiyaami annaumanahuarnikkullu Inuktut aallakkiit qanuriliurutikhat ihumagiyauyukhat piqarnikkut ukunani aallakkiikni uqauhikkut piuyuni.

Katimayiralaanguinnaqtun uqarhimayullu taimaatut angumanginnikkut inninginni malruukni-uqauhiqaqtuni ilihaiyini, piqaqtukhaq “atauhiinnarmik uqauhimik ilihautikhamik qanuriliurutikhamik” (makpiraaq 14). Ihummalungnaqtuq kitu uqauhiq tukhiqtauliqtuq piqarnikkut uqautinik tuniyauhimayut hivuagut uumanga uqautimin. Taimaatuugaluaq pitquitjutit ilaqaraluarhutik pitquiqpiarnirnik havagutikkut akhuurhainikkut, havaktikharhiurnikkut pihimanikkullu ilihaiyinik ayungittuniklu aularaanginnaqtuq (pitquitjuti 12). “Taimaatut Qaplunaatut uqauhiulluangukpat ilihautiuluni, una aularaanginnarniuyuq qapluunaanguqtirnirmun pipkainiaqtuqlu Inuktut qayangnarhiyuummirnirnun; apiriyughauyugut uvaptiknik una piyumavavitigu nunaptikni”. Piniarhimaniq anginiqaqtunik ajikkiikniqarnirnik “aallanganiqaqtuq ayurnaqtuqlu aulapkaiyaami”, piqangittumik piyumaqpiarnirmun Inuktitut aulahimaniaqtuq atuqtaulluangilluni kayumiktumik piqarniptikni inulrammiuvyainnaqtuni inugiangniptikni.

-30-

Tuhaupmapkainikkut uqaqatigivikhaq:

Karliin Aariak

Ilitturinahurnirmut Ihiviriuqhiyi – Inuktut

Uqauhinun Kamisinaup Havakvia Nunavunmi

(867) 975-5087