ᐅᖃᐅᓯᕐᓄᑦ ᑲᒥᓴᓇᐅᑉ ᐱᔭᒃᓴᖅᑖᕆᓯᒪᔭᖏᑦ
ᓄᓇᕗᒻᒥ ᐅᖃᐅᓯᕐᓄᑦ ᑲᒥᓴᓇ ᒪᓕᒐᓕᐅᕐᕕᖕᒧᑦ ᐊᒃᑐᐃᓂᖃᓐᖏᖢᓂ ᑎᒃᑯᐊᖅᑕᐅᓯᒪᖃᑦᑕᖅᐳᖅ ᑎᓴᒪᓄᑦ ᐊᕐᕌᒍᓄᑦ.
ᐊᑐᖅᖢᒋᑦ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓᑦ ᐊᒻᒪᓗ ᐃᓄᐃᑦ ᐅᖃᐅᓯᖓᑦᑕ ᓴᐳᒻᒥᐅᓯᖅᑕᐅᓯᒪᓂᖓᓄᑦ ᐱᖁᔭᕐᔪᐊᖅ, ᐅᖃᐅᓯᕐᓄᑦ ᑲᒥᓴᓇ ᐱᔭᒃᓴᖅᑖᖅᑎᑕᐅᓯᒪᕗᖅ ᓴᐳᒻᒥᔨᐅᓂᐊᕐᓂᕐᒥᒃ ᐅᖃᐅᓯᔅᓯᒍᑦ ᐱᔪᓐᓇᐅᑎᔅᓯᓐᓂᒃ ᐃᓄᒃᑎᑐᑦ, ᐅᐃᕖᖅᑎᑐᑦ ᐊᒻᒪᓗ ᖃᓪᓗᓈᑦ ᐅᖃᐅᓯᖏᑦᑎᑐᑦ ᐊᑐᖅᑎᓪᓗᓯ.
ᐅᖃᐅᓯᕐᓄᑦ ᑲᒥᓴᓇ ᐅᓐᓂᕐᓘᑎᒋᔭᐅᔪᓂᒃ ᖃᐅᔨᓴᖅᑎᐅᕗᖅ ᐊᒻᒪᓗ ᓇᐅᑦᑎᖅᓱᖅᑎᐅᓪᓗᓂ, ᖃᐅᔨᒪᔨᑕᕆᔭᐅᖃᑦᑕᖅᖢᓂ ᐊᒻᒪᓗ ᐊᔭᐅᖅᑐᐃᔨᒋᔭᐅᖃᑦᑕᖅᖢᓂ ᐅᖃᐅᓰᑦ ᓴᐳᒻᒥᐅᓯᖅᑕᐅᓯᒪᓂᑦᑎᒍᑦ ᐱᔪᓐᓇᐅᑎᓂᒃ.
ᐅᖃᐅᓯᕐᓄᑦ ᑲᒥᓴᓇ ᐃᒪᐃᑦᑐᓕᕆᖃᑦᑕᓐᖏᑦᑐᖅ:
ᐅᓐᓂᕐᓘᑎᒋᔭᐅᔪᓂᒃ ᖃᐅᔨᓴᖅᑎ
ᐅᓐᓂᕐᓘᑎᒋᔭᐅᔪᓂᒃ ᖃᐅᔨᓴᖅᑎᐅᑉ ᐱᔭᒃᓴᖅᑖᕆᓯᒪᔭᖏᑦ: ᐅᖃᐅᓯᕐᓄᑦ ᑲᒥᓴᓇ ᐱᕙᒃᐳᖅ, ᖃᐅᔨᓴᐃᕙᒃᐳᖅ ᐊᒻᒪᓗ ᐅᓂᒃᑲᐅᓯᖃᓲᖑᕗᖅ ᐅᖃᐱᓘᑎᕕᓂᕐᓂᒃ ᑕᖅᑳᓐᖔᖅᑐᓂᒃ ᐱᔾᔪᑎᓕᖕᓂᒃ ᐅᖃᐅᓯᓕᕆᓂᒃᑯᑦ ᐱᔪᓐᓇᐅᑎᓂᒃ ᓯᖁᒥᑕᕕᓂᕐᓂᒃ ᐊᑐᖅᖢᒍ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓᓐᓃᑦᑐᑦ. ᐅᖃᐅᓯᕐᓄᑦ ᑲᒥᓴᓇ ᑎᒃᑯᐊᖅᑕᐅᖃᑦᑕᕋᓗᐊᖅᑎᓪᓗᒍ ᒪᓕᒐᓕᐅᕐᕕᖕᒧᑦ, ᒐᕙᒪᒃᑯᓐᓄᑦ ᐊᑕᓂᖃᓐᖏᑦᑐᖅ.
ᓇᐅᑦᑎᖅᓱᐃᔨᐅᓂᖅ
ᓇᐅᑦᑎᖅᓱᐃᔨᐅᓂᖅ: ᐅᖃᐅᓯᕐᓄᑦ ᑲᒥᓴᓇ ᐊᒻᒪᓗ ᐃᖅᑲᓇᐃᔭᖅᑎᖏᑦ ᓇᐅᑦᑎᖅᓱᖅᑎᐅᕗᑦ ᖃᓄᖅ ᓄᓇᕗᑦ ᒐᕙᒪᒃᑯᑦ ᐱᕙᓪᓕᐊᓂᖃᕐᒪᖔᖏᑦ ᐱᔭᒃᓴᖅᑖᖅᑎᑕᐅᓯᒪᓂᕐᒥᖕᓂᒃ ᐊᑐᓕᖅᑎᑦᑎᕙᓪᓕᐊᓂᕐᒥᒃ ᓄᓇᕗᒻᒥ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᔾᔪᑎᒋᓪᓗᒋᑦ ᐅᑯᓇᓃᑦᑐᑦ: ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓ, ᐃᓄᐃᑦ ᐅᖃᐅᓯᖓᑦᑕ ᓴᐳᒻᒥᐅᓯᖅᑕᐅᓯᒪᓂᖓᓄᑦ ᐱᖁᔭᕐᔪᐊᖅ, ᕿᖓᐅᒻᒥ ᐱᔭᒃᓴᖅᑖᖑᓯᒪᔪᖅ (ᐱᓇᓱᐊᖅᑕᕗᑦ), ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ, ᐊᒻᒪᓗ ᑲᓇᑕᒥ ᐱᔪᓐᓇᐅᑏᑦ ᐃᓱᒪᖅᓱᕐᓂᕐᒧᓪᓗ ᑐᓐᖓᕕᒡᔪᐊᑦ.
ᖃᐅᔨᒪᔨᑕᕆᔭᐅᓂᖅ
ᐅᖃᐅᓯᕐᓄᑦ ᑲᒥᓴᓇᐅᑉ ᖃᐅᔨᒪᔨᑕᕆᔭᐅᓂᖓ: ᐅᖃᐅᓯᕐᓄᑦ ᑲᒥᓴᓇᐅᑉ ᑎᑎᕋᕐᕕᖓ ᑎᒥᓐᖑᖅᑎᑕᐅᓯᒪᔪᑐᐊᑦᑎᐊᖑᕗᖅ ᓄᓇᕗᒻᒥ ᐱᓕᕆᐊᓪᓗᐊᑕᓕᒃ ᐅᖃᐅᓯᓕᕆᓂᕐᒧᑦ ᑐᕌᖓᔪᓕᒫᓂᒃ. ᓄᓇᕗᑦ ᐃᓗᐊᓃᑦᑐᑦ ᓄᓇᓖᑦ ᐅᖃᖃᑎᒋᔭᐅᖏᓐᓇᕐᓂᖏᑦᑎᒍᑦ, ᖃᐅᔨᓵᖑᕙᓪᓕᐊᔪᑦ, ᐊᑐᐊᒐᓕᕆᓂᕐᓗ, ᑎᑎᕋᕐᕕᒃ ᒪᓕᒐᓕᐅᖅᑎᓄᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑐᓕᖁᔭᓕᐅᕈᓐᓇᖃᑦᑕᖅᑐᑦ ᖃᓄᖅ ᐅᖃᐅᓯᓕᕆᓂᕐᒧᑦ ᑐᕌᖓᔪᑦ ᑲᒪᒋᔭᐅᔭᕆᐊᖃᕐᒪᖔᖏᑦ ᓄᓇᕗᑦ ᐃᓗᐊᓂ.
ᐃᑲᔪᖅᓱᐃᔨ
ᐅᖃᐅᓯᕐᓄᑦ ᑲᒥᓴᓇ ᓂᐱᒋᔭᐅᕗᖅ ᓄᓇᕗᒻᒥ ᐅᖃᐅᓰᑦ ᐃᓕᓴᕆᔭᐅᓯᒪᔪᓂᒃ ᑲᒪᔨᐅᔪᓄᑦ, ᐊᒻᒪᓗ ᑖᒃᑯᐊ ᑎᒥᐅᔪᑦ ᑭᓐᖒᒪᔭᖏᓐᓂᒃ, ᓂᕆᐅᒋᔭᖏᓐᓂᒃ ᐊᒻᒪᓗ ᐱᔪᓐᓇᐅᑎᖏᓐᓂᒃ ᑐᑭᓯᑎᑦᑎᓇᓱᖃᑦᑕᖅᖢᓂ ᐅᑯᐊ ᐊᖅᑯᑎᒋᓪᓗᒋᑦ:
ᐅᖃᐅᓯᕐᓄᑦ ᑲᒥᓴᓇ ᐱᔭᒃᓴᖅᑖᖅᑎᑕᐅᓯᒪᖕᒥᕗᖅ ᑕᖅᑲᒃᑯᓂᖓ ᑐᓴᐅᒪᑎᑦᑎᔨᐅᓗᓂ ᐱᔾᔪᑎᓕᖕᓂᒃ ᐅᖃᐅᓯᓕᕆᓂᕐᒧᑦ ᐱᔪᓐᓇᐅᑎᓂᒃ.