ᐅᖃᐅᓯᕐᓄᑦ ᐱᔪᓐᓇᐅᑎᑦ

ᐅᖃᐅᓯᕐᓄᑦ ᐱᔪᓐᓇᐅᑎᑦ

ᓄᓇᕗᒻᒥ ᐅᖃᐅᓯᕐᓄᑦ ᐱᔪᓐᓇᐅᑎᑎᑦ

ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓ ᐊᖅᑯᑕᐅᓪᓗᓂ ᐃᓄᐃᑦ, ᖃᓪᓗᓈᑦ ᐊᒻᒪᓗ ᐅᐃᕖᑦ ᐅᖃᐅᓯᖏᑦ, ᐃᓕᓴᕆᔭᐅᓯᒪᓪᓗᑎᒃ ᐅᖃᐅᓯᕆᔭᐅᕗᑦ ᓄᓇᕗᒻᒥ.  ᐃᓄᐃᑦ ᐅᖃᐅᓯᖏᑦᑕ ᓴᐳᒻᒥᐅᓯᖅᑕᐅᓯᒪᓂᖏᓐᓄᑦ ᐱᖁᔭᕐᔪᐊᖅ ᓴᐳᒻᒥᐅᓯᖅᓯᒪᔾᔪᑕᐅᕗᖅ ᐊᒻᒪᓗ ᐆᒻᒪᖅᑎᑦᑎᒃᑲᓐᓂᐅᑕᐅᕗᖅ ᐃᓄᐃᑦ ᐅᖃᐅᓯᖓᓐᓂᒃ.

ᐅᖃᐅᓯᖅᑎᒍᑦ ᐱᔪᓐᓇᐅᑏᑦ ᐃᓗᐊᓃᑦᑐᑦ

  • ᐱᒋᐊᕐᓗᒍ ᓯᑎᐱᕆ 2009-ᒥ, ᐃᓕᓴᖅᑐᖁᑎᓖᑦ ᐱᔪᓐᓇᐅᑎᖃᖅᐳᑦ ᕿᑐᕐᖓᖏᑦ ᐃᓕᓐᓂᐊᖅᑎᑕᐅᔪᓐᓇᕐᓗᑎᒃ ᐃᓄᒃᑎᑐᑦ ᐃᓕᓐᓂᐊᓕᓵᕐᓂᖏᓐᓂᒃ ᖁᕝᕙᓯᖕᓂᓕᒃ 3-ᒧᑦ ᑎᑭᓪᓗᒍ.  ᐊᓯᓕᒫᖏᑦ ᖁᕝᕙᓯᖕᓂᓂ ᐃᓕᓐᓂᐊᖅᑎᑦᑎᓂᕐᒧᑦ ᑐᕌᖓᔪᑦ ᐃᓕᐅᖅᑲᖅᑕᐅᓯᒪᔪᐃᓐᓇᐅᔭᕆᐊᓖᑦ 2019 ᑐᖔᓂ.
  • ᐅᑭᐅᖅᑕᖅᑐᒥ ᑎᒥᓐᖑᖅᑎᑕᐅᓯᒪᔪᓕᒫᑦ ᑐᑦᑕᕐᕕᖏᑦ ᐊᒻᒪᓗ ᐊᕕᒃᑐᖅᓯᒪᔪᓂ ᑎᑎᕋᕐᕖᑦ, ᐃᓚᐅᓪᓗᑎᒃ ᑲᑎᒪᔨᖏᑦ ᐊᒻᒪᓗ ᑎᒥᓐᖑᖅᑎᓯᒪᔭᖏᑦ, ᓲᕐᓗ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᐊᒻᒪᓗ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦ, ᑕᖅᑲᐅᖓ ᐱᔨᑦᑎᕈᑎᓂᒃ ᐊᑐᐃᓐᓇᕈᐃᔭᕆᐊᖃᖅᐳᑦ ᐊᑐᖅᑕᐅᔪᐃᓐᓇᐅᓗᑎᒃ ᐃᓕᓴᕆᔭᐅᓯᒪᔪᑦ ᐅᖃᐅᓰᑦ.
  • 2011-ᒥ ᓄᓇᕗᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑏᑦ ᓂᕈᐊᕈᓐᓇᕐᓂᐊᖅᐳᑦ ᐃᖅᑲᓇᐃᔭᕈᓐᓇᕐᓂᕐᒥᒃ ᐃᓄᐃᑦ ᐅᖃᐅᓯᖓᓐᓂᒃ ᐊᑐᕐᓗᑎᒃ.
  • 2012 ᑐᖔᓂ, ᓄᓇᓕᖕᓂ ᒐᕙᒪᐃᑦ ᐱᔨᑦᑎᕈᑎᓂᒃ ᐊᑐᐃᓐᓇᕈᐃᓯᒪᔭᕆᐊᖃᖅᐳᑦ ᐅᖃᐅᓯᕐᓂᒃ ᐃᓕᓴᕆᔭᐅᓯᒪᔪᓂᒃ ᐊᑐᕐᓗᑎᒃ, ᑕᐃᒪᐃᑦᑐᓂᒃ ᐅᖃᐅᓯᕐᓂᒃ ᐊᑐᕈᒪᔪᑦ ᐅᓄᕐᓂᖏᑦ ᓈᒻᒪᒃᐸᑕ.
  • ᑕᖅᑳᓐᖓᑦ ᑐᑭᓯᓇᓱᖕᓂᖃᓚᐅᕐᓗᑎᒃ, ᐅᓪᓗᕐᓗ ᓇᓗᓇᐃᖅᑕᐅᓗᓂ ᒥᓂᔅᑕᐃᑦ ᑲᑎᒪᔨᖏᓐᓄᑦ, ᐃᒻᒥᒃᑰᖅᑐᑦ ᓇᖕᒥᓂᕆᔭᑦ ᐱᔨᑦᑎᕈᑎᓂᒃ ᐊᑐᐃᓐᓇᕈᐃᔭᕆᐊᖃᖅᐳᑦ ᐃᓄᐃᑦ ᐅᖃᐅᓯᖏᓐᓂᒃ ᐊᑐᕐᓗᑎᒃ.
  • ᐱᔨᑦᑎᕈᑏᑦ ᐃᓄᐃᑦ ᐅᖃᐅᓯᖏᓐᓂᒃ ᐊᑐᕐᓗᑎᒃ ᐃᓕᓐᓂᐊᕆᐅᖅᓴᖅᑐᓄᑦ ᐊᒻᒪᓗ ᐃᓐᓇᐃᑦ ᐃᓕᓐᓂᐊᕐᕕᖏᓐᓄᑦ ᐱᒋᐊᕐᓂᐊᖅᐳᑦ ᐅᓪᓗᖓ ᐋᖅᑭᒃᑕᐅᓗᓂ ᒥᓂᔅᑕᐃᑦ ᑲᑎᒪᔨᖏᓐᓄᑦ.  ᑕᒪᓐᓇ ᑎᑭᓚᐅᖅᑎᓐᓇᒍ, ᓄᓇᕗᑦ ᒐᕙᒪᒃᑯᑦ ᐃᒪᐃᓕᐅᕆᐊᖃᖅᐳᑦ:
    • ᐋᖅᑭᒃᓱᐃᓗᑎᒃ ᑐᓂᓯᓗᑎᒡᓗ ᓚᐃᓴᑖᖅᑎᑦᑎᕙᖕᓂᕐᒧᑦ ᒪᓕᒃᑕᐅᔭᕆᐊᖃᖅᐸᒃᑐᓂᒃ ᐸᐃᕆᕝᕕᖕᓄᑦ
    • ᐃᓕᓴᐃᔨᓂᒃ ᐃᓕᓐᓂᐊᖅᑎᑦᑎᓗᑎᒃ ᐊᒻᒪᓗ ᐃᓕᓐᓂᐊᕆᐅᖅᓴᖅᑐᑦ ᐃᓕᓐᓂᐊᕈᑎᒃᓴᖏᓐᓂᒃ ᐊᑐᐃᓐᓇᕈᐃᓗᑎᒃ
    • ᐋᖅᑭᒃᓱᐃᓗᑎᒃ ᐊᒻᒪᓗ ᐊᑐᐃᓐᓇᕈᐃᓗᑎᒃ ᐃᓐᓇᕐᓄᑦ ᐃᓄᐃᑦ ᐅᖃᐅᓯᖏᓐᓂᒃ ᐃᓕᓐᓂᐊᕈᑎᒃᓴᓂᒃ

ᐃᓱᒫᓘᑕᐅᔪᑦ ᐅᖃᐅᓰᑦ ᐱᔪᓐᓇᐅᑎᖏᓐᓄᑦ

ᐃᓚᒋᔭᐅᓂᕐᓄᑦ ᑕᖅᑲᒃᑯᓄᖓ ᑭᒃᑯᑐᐃᓐᓇᓄᑦ ᐅᖃᐅᓯᖃᕈᓐᓇᖅᑐᑎᑦ ᐃᓱᒫᓘᑎᒋᔭᕐᓂᒃ, ᓇᖕᒥᓂᖅ ᑭᒡᒐᖅᑐᐃᓗᑎᑦ ᐅᕝᕙᓘᓐᓃᑦ ᐊᓯᖕᓂᒃ ᐃᓄᖕᒥ, ᑎᒥᓐᖑᖅᑎᑕᐅᓯᒪᔪᓂᒃ ᐅᕝᕙᓘᓐᓃᑦ ᓄᓇᓕᖕᒥᒃ ᐃᒪᐃᑦᑐᖅᑕᖃᖅᐸᑦ:

  • ᐅᖃᐅᓯᕐᒥᒃ ᐃᓕᓴᕆᔭᐅᓯᒪᔪᒥᒃ ᐊᑲᒋᓛᑦ ᐊᑐᕐᓗᒍ ᐱᔨᑦᑎᕐᕕᐅᔪᓐᓇᓐᖏᒃᑯᕕᑦ.
  • ᐅᒃᐱᕆᔭᖃᕈᕕᑦ ᐅᑭᐅᖅᑕᖅᑐᒥ ᑎᒥᓐᖑᖅᑎᑕᐅᓯᒪᔫᑉ ᐃᓱᒪᓕᐊᖓ ᐊᒃᑐᐃᓂᕐᓗᖕᓂᖃᕐᓂᐊᕋᓱᒋᒍᖕᓂ ᐅᖃᐅᓯᕐᒥᒃ ᐃᓕᓴᕆᔭᐅᓯᒪᔫᑉ ᐆᒻᒪᕆᖕᓂᖓᓂᒃ ᓄᓇᓕᖕᓂ.
  • ᐅᒃᐱᕆᔭᖃᕈᕕᑦ ᓇᓕᐊᑐᐃᓐᓇᖅ ᐱᖓᓱᑦ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓇᓕᖅᑯᐊᕇᒃᑎᑕᐅᓗᑎᒃ ᐊᑐᖅᑕᐅᓇᓱᒋᓐᖏᒃᑯᖕᓂ.
  • ᐃᓄᐃᑦ ᐅᖃᐅᓯᖏᑦᑕ ᓴᐳᒻᒥᐅᓯᖅᑕᐅᓯᒪᓂᖓᓄᑦ ᐱᖁᔭᕐᔪᐊᖅ ᐅᕝᕙᓘᓐᓃᑦ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓᑦᑕ ᐃᓗᐊᓃᑦᑐᑦ ᓇᓕᐊᑐᐃᓐᓇᖅ ᐊᑐᖅᑕᐅᓇᓱᒋᓐᖏᒃᑯᖕᓂ.

ᐅᖃᐅᓯᕐᓄᑦ ᑲᒥᓴᓇᐅᑉ ᑎᑎᕋᕐᕕᖓ ᓴᐳᒻᒥᐅᓯᖅᓯᓯᒪᔪᓐᓇᖅᐳᖅ ᐅᖃᐅᓯᓕᕆᓂᕐᒧᑦ ᐱᔪᓐᓇᐅᑎᓂᒃ ᑭᓯᐊᓂ ᐃᓄᐃᑦ ᐅᖃᐅᓯᖃᖃᑦᑕᖅᐸᑕ ᐃᓱᒫᓘᑎᒋᔭᕐᒥᓂᒃ.