ᑭᒃᑰᓂᕗᑦ

ᐅᖃᐅᓯᕐᓄᑦ ᑲᒥᓯᓇ

 

ᓵᓐᑐᕋ ᐃᓅᑎᖅ

ᓵᓐᑐᕋᐅᑉ ᐱᓇᔪᐊᕆᔭᖓ ᐃᓄᖕᓂᒃ ᖃᐅᔨᓴᖃᑦᑕᖅᖢᓂ ᐅᖃᐅᓯᕐᓂᒃ ᓈᒻᒪᙱᓐᓂᐅᔪᓂᒃ ᓄᓇᕗᒥᐅᑕᑦ ᑐᙵᕕᒋᓪᓗᓂᒋᑦ. ᖃᐅᔨᓯᒪᓕᖅᑐᖅ ᑭᖑᓂᑦᑎᓐᓂ ᑭᒡᒐᖅᑐᕈᑎᒋᖃᑦᑕᖅᑕᖏᑦ ᐊᔾᔨᒌᙱᑦᑐᓂᒃ ᑲᑎᒪᔨᓂᒃ ᑭᒃᑯᑐᐃᓐᓇᓂᒃ ᐃᖅᑲᖅᑐᐃᕕᓕᕆᔪᓂᒃ ᐱᔾᔪᑎᓕᖕᓂᒃ ᒪᒃᑯᒃᑐᓂᒃ ᐊᒻᒪ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᐊᑑᑎᖃᑦᑎᐊᖃᑦᑕᖅᓯᒪᔪᑦ ᐱᓕᕆᐊᖓᓐᓄᑦ.  

ᓵᓐᑐᕋ ᐃᓕᓐᓂᐊᓚᐅᖅᓯᒪᕗᖅ ᐃᓄᐃᑦ ᐱᐅᓯᑐᖃᖏᓐᓂᒃ ᐊᒻᒪ ᓄᓇᑖᕐᓂᕐᒧᑦ ᐱᓇᔪᒍᑕᐅᔪᓂᒃ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᖅᑐᓂᒃ ᐋᑐᕚᒥ. ᐃᖅᑲᓇᐃᔮᖃᓚᐅᖅᓯᒪᓪᓗᓂ ᒪᓕᒐᓕᕆᔨᒃᑯᓐᓂ ᑲᓇᑕᒥ ᒪᓕᒐᓕᕆᔨᙳᕆᐅᖅᓴᓂᕐᒧᑦ ᐱᓕᒻᒪᒃᓴᖅᖢᓂ, ᓅᓚᐅᖅᓯᒪᕗᖅ ᐃᖅᑲᓇᐃᔮᖅᑖᖅᖢᓂ ᐊᓄᓪᓚᒃᓯᖅᑐᓂᒃ ᐃᖅᑲᖅᑐᖅᑕᐅᕝᕕᒃᓴᖏᓐᓂᒃ ᐅᑕᖅᑭᔪᓂᒃ ᐅᑎᕈᒪᓕᓚᐅᖅᓯᒪᓪᓗᓂᓗ ᐋᑐᕚᒧᑦ ᐃᓕᓐᓂᐊᕆᐊᒃᑲᓐᓂᕐᓗᓂ. ᓄᓇᕗᑦ ᓴᖅᑭᓚᐅᙱᑎᓪᓗᒍ ᐊᖏᕐᕋᒥᓄᑦ ᐅᑎᓚᐅᖅᓯᒪᕗᖅ ᐃᖅᑲᓇᐃᔭᕆᐊᖅᖢᓂ ᓄᑖᒧᑦ ᓄᓇᕗᑦ ᒐᕙᒪᒃᑯᓐᓄᑦ. ᐃᖅᑲᓇᐃᔮᖃᖅᖢᓂ ᐊᑐᐊᒐᓕᕆᔨ ᐊᕐᕌᒎᖕᓄᑦ ᒪᕐᕉᖕᓄᑦ ᓇᑉᐸᕐᒥᒃ ᐃᓚᓪᓗᒍ ᑭᓯᐊᓂ ᐅᑎᕆᐊᖃᓕᕐᒥᒐᒥ ᐃᓕᓐᓂᐊᖅᑕᒥᓄᑦ ᐊᑭᑦᓯᕋᖅ ᒪᓕᒐᓕᕆᔨᒃᓴᓄᑦ ᐃᓕᓐᓂᐊᕐᕕᖕᒧᑦ.  

2005-ᖑᑎᓪᓗᒍ ᐃᓕᑕᕆᔭᐅᔾᔪᑎᑖᓚᐅᖅᓯᒪᕗᖅ ᒪᓕᒐᓕᕆᔨᒃᓴᐅᔾᔪᑎᒃᓴᒥᒃ, ᐊᓂᒍᐃᓚᐅᖅᓯᒪᓪᓗᓂᓗ ᐱᓕᕆᐊᕆᔭᒥᓂᒃ 2006-ᖑᑎᓪᓗᒍ ᒪᓕᒐᓕᕆᔨᐅᓕᕋᒥ: ᓯᕗᓪᓕᖅᐸᐅᓪᓗᓂ ᐃᓅᓪᓗᓂ ᐊᕐᓇᖅ ᓴᐳᓐᓂᐊᖅᑎᐅᓕᖅᖢᓂ ᓄᓇᕗᒻᒥ. ᐃᖅᑲᓇᐃᔭᓚᐅᖅᓯᒪᓪᓗᓂᓗ ᒪᓕᒐᓕᕆᔨᓂᒃ ᓄᓇᕗᑦ ᒐᕙᒪᒃᑯᓐᓂ ᐊᕐᕌᒎᒃ ᒪᕐᕉᒃ ᐅᖓᑖᓄᑦ ᑭᖑᓂᐊᒍᓪᓗ ᐃᖅᑲᓇᐃᔭᓚᐅᖅᓯᒪᒋᓪᓗᓂ ᐅᖃᐅᓯᕐᓄᑦ ᑭᒡᒐᖅᑐᖅᑎᐅᓕᖅᖢᓂ ᓄᓇᕘᒧᑦ ᐊᑐᐊᒐᓕᕆᔨᓄᑦ ᑐᑭᒧᐊᒃᑎᐅᓪᓗᓂ. ᔭᓄᐊᕆ 2013-ᒥ ᐅᖃᐅᓯᕐᓄᑦ ᑭᒡᒐᖅᑐᖅᑎᙳᖅᑎᑕᐅᓚᐅᖅᓯᒪᓪᓗᓂ ᓄᓇᕘᒧᑦ.

 

ᐃᖅᑲᓇᐃᔭᖅᑏᑦ

 

ᓵᓐᑐᕋ ᐃᓅᑎᖅ  -  ᐅᖃᐅᓯᕐᓄᑦ ᑲᒥᓯᓇ

ᓵᓐᑐᕋ ᐊᓂᒍᐃᓚᐅᖅᓯᒪᔪᖅ ᐊᑭᑦᓯᕋᖅ ᒪᓕᒐᓕᕆᓂᕐᒧᑦ ᐃᓕᓐᓂᐊᕐᓂᕐᒥᒃ 2005-ᖑᑎᓪᓗᒍ. ᑐᖔᓂ ᐊᕐᕌᒍᓄᑦ 7-ᓄᑦ ᐃᖅᑲᓇᐃᓚᐅᖅᑐᖅ ᐊᑐᐊᒐᓕᕆᓂᕐᒥ ᐊᑐᐊᒐᕐᓄᓪᓗ ᖃᐅᔨᓴᕐᓂᕐᒥ. ᓵᓐᑐᕋ ᐱᓕᕆᐊᖃᒻᒪᕆᒍᒪᕙᒃᐳᖅ ᐅᖃᐅᓰᑦ ᐱᔪᓐᓇᐅᑎᖏᓐᓄᑦ ᖃᐅᔨᒪᓪᓗᓂᓗ ᐊᔭᐅᖅᑐᐃᔾᔪᑕᐅᒋᐊᖃᒻᒪᕆᖕᓂᖏᓐᓂᒃ. ᐱᓕᕆᖃᑦᑕᖅᓯᒪᔭᖓ ᑭᒡᒐᖅᑐᐃᓂᕐᒥᒃ ᒪᒃᑯᒃᑐᓂᒃ ᐊᒻᒪ ᐊᓯᖏᓐᓂᒃ ᑲᑐᔾᔨᖃᑎᒌᓂᒃ ᐊᑐᕐᓂᖃᕈᓐᓇᑦᑎᐊᕐᓂᖓᓂᒃ ᒫᓐᓇ ᐱᓕᕆᐊᕆᖃᑦᑕᓕᖅᑕᒥᓄᑦ. ᖁᕕᐊᒋᔭᖃᓲᖅ, ᐱᓱᔪᖕᓂᕐᒥᒃ, ᓂᕿᓕᐅᕐᓂᕐᒥᒃ, ᒥᖅᓱᕐᓂᕐᒥᒃ ᐅᖃᓕᒫᕐᓂᕐᒥᒡᓗ.

 

ᓇᓗᓇᐃᒃᑯᑕᐅᑉ ᒥᒃᓵᓄᑦ

ᓇᓗᓇᐃᒃᑯᑕᐅᑉ ᒥᒃᓵᓄᑦ

ᓇᓗᓇᐃᒃᑯᑕᑦᑕ ᒥᒃᓵᓄᑦ

ᖃᔅᓯᑲᓪᓚᖕᓂᒃ ᑐᕌᕆᔭᖃᓚᐅᖅᑐᒍᑦ ᓇᓗᓇᐃᒃᑯᑕᖅᐳᑦ ᓴᖅᑭᑎᑕᐅᕙᓪᓕᐊᓕᖅᑎᓪᓗᒍ. ᑖᒃᑯᐊ ᑐᕌᕆᔭᕗᑦ .  ᐅᕝᕙᐅᕗᑦ:

ᐊᑐᕈᒪᓚᐅᓐᖏᑦᑐᒍᑦ ᑎᑎᕋᐅᔭᖅᓯᒪᕈᓗᑐᐃᓐᓇᖅᑐᓂᒃ ᐅᕝᕙᓘᓐᓃᑦ ᐊᑐᖅᑕᐅᓗᐊᖅᑐᓂᒃ, ᐃᓄᖕᓄᓪᓗ ᑐᕋᖓᔪᓂᒃ ᐊᑕᐅᓯᐅᓐᖏᑦᑐᓂᒃ ᐃᓚᖃᐅᖁᓚᐅᕐᒥᔭᕗᑦ ᓄᓇᕗᒻᒥᐅᓄᑦ ᐃᓕᓴᕐᓇᕐᓂᖅᓴᐅᓂᐊᕐᒪᑦ.  ᑕᒪᒃᑯᐊ ᑐᕌᒐᓕᐊᕆᓚᐅᖅᑕᕗᑦ ᑎᑭᐅᑎᖅᑰᖅᑕᕗᑦ.

ᑖᓐᓇ ᐊᔾᔨᙳᐊᖅ ᓇᐅᒃᑯᓕᒫᖅ ᓴᖅᑭᑎᑦᑎᓇᓱᒃᐳᖅ ᑐᓴᐅᒪᖃᑦᑕᐅᑎᓂᕐᒥᒃ, ᑕᒪᓐᓇ ᓲᖃᐃᒻᒪ, ᐅᖃᐅᓯᐅᑉ ᐱᔾᔪᑎᒋᖕᒪᒍ, ᑖᔅᓱᒪᓗ ᑎᑎᕋᕐᕕᐅᑉ ᑐᕌᕆᕙᖓ ᓴᐳᔾᔨᓯᒪᓂᖅ ᐱᔪᓐᓇᐅᑎᒋᔭᐅᔪᒥᒃ ᑐᓴᖅᑎᑦᑎᔪᓐᓇᕐᓂᕐᒥᒃ ᓇᓕᐊᖕᓄᑐᐃᓐᓇᖅ ᐅᖃᐅᓯᕐᓄᑦ ᐃᓕᓴᕆᔭᐅᓯᒪᔪᓄᑦ.